John 13

Yísufa narí faiqi námu níku namári uqu ufafa.

1Ánutuna áinnaaqarara qoomaqa adeedí ramáfufanoo Yísufa maa-maqána quqásee dóo narí ákoofinai fírafa adeedí réemarufanoo minára Yísufa írimarinau. Maa-maqa maaqánakinaasa narísaa atooqéemariasara ámuqusufanoo rídanoo káqi misára áidimarufanoo fídanoo kasaaqaí múnu kúqinau.

2Yísufa nárana eendáki sakasáida narí faiqi námufaqa néemarinau. Yudasifa Keerioota máqusaindaraafa indaarúqaa Simoona amarána ámaaku mifá Yísuna faiqi námufaqa miqóo márufa fáasai Sadannafa miná dadaaqufanoo Yísunara ueeqáraree qídanoo deedaqímarinau. 3Ánutufa aiqáma afeeka innaarúna faqa maqá faqa Yísuna áramandunnai quqáqoofanoo márufanoo Yísufa miná írida marínau. Narí Ánutufinaindari qúmufa íridanoo márinau. Narí kaifáa Ánutufinnai óoru fírafa adeedí ranóo márufanoo minára faqa írida marínau. 4Yísufa narí faiqi námufaqa nárana námaseenoo fíndifinoo narí siuta raipáqusee táura qumáreenoo narí áranandáuqanna rumbáseenoo dífaani maraséenoo nammári minakí adíaseenoo narí faiqi námu níku nammáruqusaidanoo táurannai rukánnimaqéemarinau.

(Yísufa máru aukuana miná máqannaa óosana maaqímminoo márinau. Faiqí moó fannoo moo máqusaindari narí áqoondi qáfararee qímasee ani miná máaqaki kéeqafinanoo máaqa akoofa mi-fasiqána qáfeenoo narí aináinira fasiqa uréeqarana áaramasee qímaminoo anée maa-fasiqána áiku nammáruquseenana táura qumáree rukásainanoo óoqumariani. Mi-oosanna níku nammáruqira saika sía úriqararausa máree maríqau uréeqarausa faaqu fásiqa fooqáasa miqímariqau.)

6Yísufa Simoona moo áuqu Peetooroona áiku nammáruqirarufanoo Simoona moo áuqu Peetooroofa qinau. Óo Karaambáiqa kúqaa fee anée qiní qíku nammáruqiraree qídanee. Sía miqía, anée úriqararafa máriananoo.

7Yísufa qinau, Eeóo nammári úquanaura anée maqee sía qiní óosana írimariananoo kásooqaqee írinnaranoo.

8Peetooroofa qinau, anée maasá úriqararafa máriananoo náaru náaru sía uqanna qiní mandá qíku nammáruqua.

Yísufa miná iriséenoo qinau. Qinée aní áiku sía nammári úquanana maaqóoqari anée sía qiní faiqikínnaranoo.

9Simoona moo áuqu Peetooroofa mi-ufána iriséenoo qinau. Óo karaambáiqa sía qíku kai nammáruqua qísauku faqa qíkiaqa faqa aiqáma nammári úqua.

10Yísufa miná iriséenoo qinau. Faiqí nammári áuqeemáriasa aiqáma nifaaqa ámiqinoo máridanoo níku kai dooná kookoomma ákinoo máridanoo. Ínnee aiqáma ámiqiqa máriafanoo moodáa fannoo mandáikinoo márifaqa qáfaidaqa. 11Yísufa fáasai narí ueeqée marúna qáfaidanoo miqí qinau. Ínni nifaaqa aiqáma nammári úqinoo máridanoo. Moodáa fannoo kai sía nammári áuqara fee qinau. Narí ueeqáaninnanara iriséenoo miqí qinau.

12Yísufa narí faiqi námu níku nammári úquseenoo kafáa narí siuta afisúmaree kafáa misá faqa óoqumari fínoo qímanniminoo qinau. Qinée ínni níku nammári úqunnanara íridee sía fee íridee. 13Dóo maqee miná nammári úqunnana óosana kooroo ianáura. Ínnee qiníara ufasáa rakísira fee karaambáiqee qímariafanoo. Dóo miná kúqaa qímariafanoo qinée miqírausa máridaqa. 14Qinée ínni ufasáa rakísirausa ínni karaambáiqa máridaqa uréeqarausa saika máreemariana misá naanna ráidaqa ínni níku nammári úqidaqa ínnee miqí kai íqa qiní daanna réeqa uréeqara fasiqa anaaseera foora narí dadaaqí narí dadaaqíaqa. 15Qinée uqannífiqaunnana qáfeeqa qinée únandee kai iaqanani. 16Qinée kúqaa ánoona ufa ínni qímannimidaqa. Aináinira fasiqa fannoo sía narí rakísirana úriqararafa máridanoo. Ufa máree fímari fasiqafa sía aqiqéemarina úraaqararafa máridanoo. 17Ínnee maqee maa-ufána ánoona náaqooki írimariafanoo. Ínnee maa-ufána irisée áuqaifanoo asasírafa máriannoo.

18Yísufa kaifáa narí faiqi námu maaqí qímasee qímanniminau. Ánutuna tamummáqara fasiqauqa óoqeenaa ákara óosana maaqímminoo máridanoo.

Ínnikiqari moodáa fannoo qiní nárana qiní faqa néemarifa mifá qiní namuqáakinoo áranaiqi dáruannoo.
Maa-akarána óosana ínniki kambíqaannoo, sía ínni aiqámara qídaqa. Qinée óonu maréeqee qeeqáindikamaqaunausa máriafanoo moodáa fannoo kai. 19Qinée maqeesáa qímannimidaqa sía kambíqai kamuqoo qímannimidaqa. Kambíqainaqa ínnee qiníara írifaranoo. Qinée qeeqáraa ufa qúnausa dóo misáki máridaqa. 20Qinée ánoona ufa kúqaa qímannimidaqa. Faiqí ánaasee moó fannoo qinée ínni niqiqámáqaanausa níqoondikinafa qiní faqa qíqoondikidanoo. Faiqí ánaasee moó fannoo qiní qíqoondikammáqimaqáinafa qiní diqiqámaqoona faqa kai áqoondikidanoo.

Yísufa narí uqeeqéefandinna úfana kooroo u úfafa.

(Mataioo 26:20-25; Mareekoo 14:17-21; Ruka 22:21-23)

21Yísufa minára qímanniminsoofanoo narí aunduráki óonumafi írufanoo ámuqusufanoo kafáa kooroomásee qímanniminau. Qinée ánoona ufa qímannimidaqa ínnikiqari moó fannoo qiníara ueeqáannoo.

22Yísuna faiqi námu mi-ufána iriséeqa tautúmakufaqa narí qáfee narí qáfee ídaqa randáqau. 23Yísuna afaaqasáa aqoondi fannoo miná aaqá óoqumarifi márinau. 24Simoona moo áuqu Peetooroofa mi-fasiqána áuqamaseenoo qinau anée karaambáiqa irámmirisee íria. Yáfasiqanaree qídanoo fee yáfee aní ueeqáannoo fee.

25Miqí qufanoo mi-fasiqáfa Yísuna aaqá fírambáqafufanoo maqándanai irámmirinau Karaambáiqa yáfee aní ueeqáannoo fee. 26Yísufa qinau, qinée féemu rakéemandeeqa sáuna anoona fooqáanaki raaraamándee ámianana qáfa. Mifá kai qiní ueeqáannoo. Miqí qímasee Yísufa féemu rakéemaseenoo sáuna anoona fooqáanaki raaraaméeqeenoo Yudasifa Keerioota máqannaa Simoona amarána ámaaku áminau. 27Yudasifa mi-feemúna qumárasee námasoofanoo dóo Sadannafa miná aundurai kéeqanau. Miqúfanoo Yísufa Yudasina qímaminoo qinau. Dóo anée aneenná ínna ainaina dóo dauní dauni ía. 28Miqóo márusa sía Yísuna ufa óosana íriqau. 29Yudasifa Yísuna faiqi námu munnimmasáa rakísimarufa márufanoo Yísufa aqiqoofaqa misá nárana aina fí fi̱ máraanifeera aqiqée foo qiqau. Kudi fásiqauqa munnimma nímiannoo fee qiqau.

30Yudasifa mi-feemúna mara námaseenoo fíndimeeqeenoo aaqee kái eendáki ráudamaki finau.

Yísufa fúka aaquqíra úfa qímannimu ufafa.

31Yudasifa fufanoo Yísufa kaifáa narí faiqi námu qímanniminoo qinau. Dóo maqee faiqí nímaaku qiní ámiqi ámiqira afeeka eeraarirafa dóo kooroo inóo máridanoo. 32Ánutuna áfeeka eeraarirafa qinísaa kooroo inóo máridanoo, Ánutufa narí uqanna quándaki qiní qifaaqa firaaqóo aréenaannoo, qúsasaa maqee uqanná miqíannoo. 33Qiní faiqi námu sía kísaaqasaa ínniki márianaura. Yuda máqannaa qímannimiafannandee kai ínni qímannimidaqa. Ínnee qiníara randée sía paqúrifaranoo. Qinée fúannaqoo sía ínnee amana fifáranaoo. 34Dóo maqee qinée fúka aaquqíra ufa qímannimidaqa. Ínnee naríara naríara nímuqusidaqa naríara naríara ruaqa. Qinée ínniara qímuqusufaqa ínniara rímariqia ínnee faqa qiní daanna raaqa naríara naríara ruaqa. 35Ínnee naríara naríara rímarifaqa aiqámausa ínni níndafeeqa ínniara bóo Yísuna faiqi námu miqídammiafoo qiaqa.

Yísufa Peetooroofa naríara qáoo qíanínna úfana kooroou úfafa.

(Mataioo 26:31-35; Mareekoo 14:27-31; Ruka 22:31-34)

36Yísufa miqí qímasoofanoo Simoona moo áuqu Peetooroofa irámmirinoo qinau, Óo Karaambáiqa anée yái fee fínaqee maasá sía aní faqa fuanáuree.

Yísufa iriséenoo qinau, Qinée maqee fúanannai anée sía amana qiní faqa finnáranoo, kásooqaqee anée qiní faqa finnáranoo.

37Simoona moo áuqu Peetooroofa iriséenoo qímaminau, Karaambáiqa anée náqi náqee qinée sía aní faqa fuanáuree. Qinée aníara kúquanauranoo. 38Yísufa mi-ufána iriséenoo qímaminoo qinau, Kúqaa fee anée maqee qiníara kúqinnaree, qinée ánoona ufa aní qímamidaqa fáfaa eendáki kookooráana sía ufa qínnakamuqoo anée kúqiranara rufíaseenana qaaramoo kári qiníara sía qáfaunausee qínanoo kookooráana ufa qíannoo.